Líkamsræktarþjálfarinn Gurrý Torfadóttir segir marga byrja að æfa heima og mælir með ákveðnum grunnpakka þegar kemur að búnaði.
„Fólk mun halda áfram að æfa heima þó líkamsræktarstöðvarnar hafi verið opnaðar aftur. Þetta er framtíðin,“ segir Guðríður Torfadóttir, eða Gurrý eins og hún er kölluð. Hún er landsþekktur þjálfari og rekur Yama heilsurækt þar sem hún býður upp á fjarþjálfun sem kallast Yama online.
„Það er mikill tímasparnaður fólginn í því að æfa heima og ég held að fólk eigi eftir að æfa meira en það hefur gert þegar stöðvarnar verða opnaðar aftur að fullu, taki þá æfingar í ræktinni þrisvar í viku og noti heimagymmið tvisvar í viku,“ segir hún.
Grunnpakkinn
Gurrý segir afar einfalt að byrja að æfa heima og mælir með ákveðnum grunnpakka þegar kemur að búnaði. „Fyrir þá sem eru að taka fyrstu skrefin mæli ég með því að fólk kaupi tvö pör af handlóðum, góða jógadýnu og þrjár teygjur með mismunandi stífleika. Önnur handlóðin eru léttari til að lyfta fyrir ofan höfuð og þjálfa efri partinn en hin þyngri fyrir stærri vöðvana, til dæmis til að nota í hnébeygjum eða réttstöðulyftu. Teygjurnar eru yfirleitt seldar þrjár saman í pakka og hægt að gera endalaust af æfingum með þeim. Þegar ég set saman æfingakerfi fyrir fólk til að æfa heima þá miða ég við að fólk eigi þetta. Það þarf í raun ekki meira,“ segir hún.
Kostnaðurinn við þennan grunnpakka er um 30 þúsund krónur en fer þó eftir þyngd lóðanna. Hægt er að miða við að par af 5 kílóa lóðum kosti um 6 þúsund og par af 10 kílóa lóðum kosti um 12 þúsund, pakki með þremur teygjum kostar um 3 þúsund og jógadýna 8-10 þúsund krónur.
Meiri fjárfesting
„Ef fólk vill fara í meiri fjárfestingu væri gott að kaupa annað hvort hjól eða róðrarvél. Hjól hentar öllum og er frábært fyrir fólk sem er ekki í neinu formi. Hjól sem heita BikeErg eru vinsæl og afreksfólk notar þau líka. Kostirnir við róðrarvél er að það fer lítið fyrir henni þegar ekki er verið að nota hana og fólk notar allan líkamann við að róa, bæði fótleggi og efri partinn. Með því að bæta við annaðhvort hjóli eða róðrarvél er líka hægt að nota það til að hita upp og fá blóðið á hreyfingu eða taka stuttan sprett á miðri æfingu til að keyra púlsinn vel upp,“ segir Gurrý.
Bílskúrinn innréttaður
Ekki þarf endilega sérstakaaðstöðu til að æfa með grunnpakkanum heldur dugar stofugólfið ágætlega. Einfalt er að ganga frá róðrarvél en hjólið þarf sinn stað. Margir hafa svo hreinlega nýtt aukaherbergi eða pláss í bílskúr. Fyrir þá sem eru með rúmgóða aðstöðu mælir Gurrý með kaupum á gólfmottum eins og eru á líkamsræktarstöðvum, hörðum mottum sem lóð mega detta á og fást í mismunandi verðflokkum.
„Þar gæti fólk sett lyftingabekk, stöng, lóðaplötur og rekka. Þá er bara komin lítil líkamsræktarstöð og margir sem eru komnir í þennan pakka. Ég mæli með að fólk bæti við sig í þessum skrefum og sjái hvort það notar búnaðinn áður en það leggur í meiri fjárfestingu,“ segir hún og bendir líka á að passa upp á að börn komist ekki í lóðin vegna slysahættu.
