Tónlistarmaðurinn Páll Óskar Hjálmtýsson skilaði skömminni á laugardaginn og birti myndir af sér á Facebook sem óprúttinn aðili var að dreifa um samfélagsmiðla. Páll Óskar sendi myndirnar á manninn í trúnaði í gegnum stefnumótaforritið Grindr. Á myndunum er hann nakinn.
„Fávitinn, sem ég sendi þessar myndir í trúnaði á Grindr og er nú að dreifa þeim út um allt – til að fá mig til að skammast mín fyrir að hafa líkama og lifa kynlífi – er rúmlega 30 árum of seinn!“ sagði söngvarinn í færslunni.
Páll Óskar var í viðtali á K100 í morgun til að ræða um málið. Honum sagðist vera létt eftir að hafa birt myndirnar sjálfur. „Það var þungu fargi af mér létt um leið og ég var búinn að ýta á „send“ og sleppa tökunum af þessu,“ sagði hann í morgunþættinum Ísland vaknar í morgun.
Páll Óskar fékk mjög jákvæð viðbrögð við myndbirtingunni. Hann segir að hann hafði samband við fjölskyldu og vini og lét þau vita áður en hann birti myndirnar. „Viðbrögðin voru öll bara „go Palli“ og nákvæmlega skila skömminni þar sem hún á heima. Vegna þess að skömmin var aldrei hjá mér. Skömmin er aldrei hjá þeim sem treystir. Skömmin er hjá þeim sem brýtur traustið, brýtur trúnaðinn.“
Páll Óskar rifjar upp samtalið við manninn sem hann átti fyrir einu og hálfu ári síðan. Hann segir að maðurinn hafi talað góða íslensku og hafi yfir heildina komið vel fyrir. Hann segir að maðurinn hafi stungið upp á því að þeir myndu skiptast á myndum deginum eftir að þeir byrjuðu að tala saman. „Hann sendir mér einhverjar þrjár myndir og ég sendi til baka þrjár myndir og nokkrum sekúndum síðan að þá hvarf hann, eins og hann hefði blokkað mig eða það kom bara einhver melding „this profile is no longer available.“ Þarna fékk ég hnút í magann, þarna leið mér eins og ég hefði bara hlaupið fyrsta apríl,“ segir hann.
Fyrir ári síðan frétti Páll Óskar að myndirnar af honum voru í dreifingu. Hann fékk engar hótanir eða ógnandi skilaboð vegna myndanna. „Það eina sem gerist er að ég tek eftir því að myndirnar fara á flug og þær poppa mikið upp á messenger spjalli inn á lokuðum síðum í lokuðu spjalli hjá fólki og Facebook og Snapchat. Ég hugsa með mér hvað á ég að gera? Á ég að skammast mín, finn ég fyrir einhverri skömm gagnvart sjálfum mér? Nei. Skammast ég mín fyrir að vera hommi, skammast ég mín fyrir að vera á Grindr, fyrir það hvernig ég lít út, eða að ég sé með rass, eða að ég vilji stunda kynlíf? Bara svarið við öllu ofangreindu er nei, ég get ekki skammast mín fyrir neitt af þessu það kemur ekki til greina.“
Því miður veit Páll Óskar ekki hver þetta var sem dreifði myndunum þar sem aðilinn villti á sér heimildir. Hann segir að ef hann vissi hver þetta væri þá myndi hann ekki hika við það að kæra.
Hlustaðu á allt viðtalið í spilaranum hér að neðan.
