Leikarinn Gunnar Cauthery er Íslendingur í móðurætt en er fæddur og uppalin í Bretlandi. Hann er búsettur um þessar mundir í Bretlandi en langar að flytja til Íslands.
Gunnar byrjaði leiklistaferil sinn á Íslandi þegar hann var þrettán ára gamall. Hann lék Roland í kvikmyndinni Benjamín dúfa, sem kom út árið 1995.
Síðan þá hafði hann ekki leikið hérlendis, þar til í fyrra þegar hann fór með lítið hlutverk í myndinni Eurovision Song Contest: The Story of Fire Saga, sem naut gríðarlega vinsælda á Netflix. Hann segir frá stórkostlegum mistökum sem áttu sér stað á tökustað.
„Ég skrapp til Húsavíkur í fyrra til að leika smáhlutverk í myndinni Eurovision. Síðan lék ég í öðru atriði sem var tekið upp í kvikmyndaveri hér í Bretlandi. Það var búið að dressa settið eins og það væri tónlistarkennslustofa í Húsavík. Það leit mjög vel út. Það var ýmislegt upp á vegg, myndir og texti á íslensku. Allt bara mjög fínt, pottþétt. En það voru ein mistök, smá missklilningur kannski […] Það voru myndir uppi á vegg af nótum og það stóð undir nótunum hvað þær hétu á íslensku. Það stóð: „Heil nóta“, „hálf nóta“, „fjórðaparts nóta“ og „man þetta ekki á íslensku,““ segir Gunnar í myndbandi frá CAI.
„Ég ákvað að segja ekki neitt og þessi sena endaði sem betur fer á klippigólfinu.“
Gunnari langar að flytja til Íslands. „Ísland kallar alltaf til mín. Mig langar mjög mikið til að vinna á Íslandi og bara vera á Íslandi. Sérstaklega eftir að ég varð pabbi. Ég á tveggja ára dreng sem heitir Ívar, hann spjallar heilmikið á íslensku og skilur miklu meira. Hann segir alltaf: „Sjáumst sneinna“ þegar hann kveður afa og ömmu. Og mig blóðlangar til að gefa honum tækifæri til að vera á Íslandi og læra tungumálið og bara vera þar,“ segir Gunnar. Gunnar hefur verið að gera það gott erlendis og leikið meðal annars í sjónvarpsþáttunum Mars og The Demon Headmaster auk þess sem hann ku vera með spennandi járn í eldinum.