Eins og greint hefur verið frá í fréttum undanfarið hefur stór hluti starfsfólks hjá Torgi verið sent heim í sóttkví eftir að smit greindist hjá starfsmanni. Torg rekur fjölmiðlana Fréttablaðið, DV og Hringbraut.
Þetta tímabundna ástand hefur engin áhrif á útgáfu og birtingar en kostar aðlögunarhæfni hjá stórum hluta starfsmanna.
Linda Blöndal, annar stjórnandi frétta- og umræðuþáttarins 21 á Hringbraut, er ein af þeim sem skikkuð eru í sóttkví og sendir út þáttinn nú heiman frá sér úr stofunni sinni í Kópavoginum.
„Zoom tölvusamskiptakerfið er orðið landsmönnum mjög tamt og þess vegna notum við það. Ég breytti bara stofunni heima og átti alvarlegt samtal við heimilisköttinn um að hafa aðeins lægra um þessar mundir enda vel dekruð læða sem mjálmar hátt og mikið á stundum,“ segir Linda í spjalli við DV.
Hraðar hendur þurfti til að koma þættinum í loftið vegna þess að Linda var skikkuð í sóttkví þótt svo hafi reynst að hún mælist ekki eftir skimun með vírusinn.
„Ég óttaðist að hávært spjallið í henni Spottu minni færi inn í upptöku á fyrsta viðtalinu við fulltrúa Rauða krossins en hugsaði þó sem svo að það þætti áhorfendum bara skemmtilegt. Þó má blessunin ekki yfirgnæfa alvarleg viðtöl, ónei,“ segir Linda.