Ólafur F. Magnússon, fyrrverandi borgarstjóri og læknir, hefur mikið látið að sér kveða við ljóðagerð og lagasmíðar undanfarin ár. Ólafur kynnir nú nýtt lag sitt sem er samið við kvæði Hannesar Hafstein, Blessuð sólin elskar allt.
Guðlaug Dröfn Ólafsdóttir syngur lagið en Vilhjálmur Guðjónsson leikur á öll hljóðfæri, gítarar, klarinett, sópransaxófón, flygelhorn, flautu, hljómborð, bassa, píanó og ýmis fleiri hljóðfæri.
Um tilurð lagsins segir Ólafur í stuttu spjalli við DV:
„Ég sat úti á Naustabryggjusvölum í morgunsólinni í byrjun sumars og blessuð sólin yljaði hug minn og hjarta svo mjög að áður en ég vissi af – þá kom fullskapað lag til mín við ljóð Hannesar Hafsteins – Blessuð sólin elskar allt. Ég hringdi svo í Vilhjálm í hádeginu sama dag og söng lagið fyrir hann í símann. Síðan hefur Vilhjálmur tekið nokkrar skorpur við að útsetja lagið og búa til millikafla og stígandi í því og það var strax ákveðið af okkur báðum að biðja söngkennara minn og úrvalssöngkonuna Guðlaugu Dröfn Ólafsdóttur um að syngja lagið og velja tóntegund í samræmi við hennar fallegu rödd og víða tónsvið.
Friðrik Grétarsson tók myndir af Guðlaugu úti í náttúrunni (við Hengilsrætur) að syngja lagið og síðan bætti hann við myndskotum úr ferð sinni um landið í byrjun júlímánaðar.
Mér finnst afurðin sem við fjögur höfum skilað af okkur í laga- og myndbandsgerðinni gullfalleg og hæfa því ljóði sem hinn tilfinningaríki og listræni fyrsti ráðherra Íslands samdi.á sínum tíma. Ljóðið á líka vel við þá tilfinningaveru og stjórnmálamann sem býr í mér eins og þjóðskáldinu og ekkert vantar á rómantíkina hjá okkur báðum – mér og þjóðskáldinu.“