Manuela Ósk Harðardóttir, áhrifavaldur og athafnakona, og kærasti hennar og dansarinn Jón Eyþór Gottskálksson, voru í Ísland í dag í gærkvöldi.
Í þættinum ræða þau um upphaf ástarsambands þeirra og hvað framtíðin ber í skauti sér. Manuela ræðir einnig um útlitsbreytingar sínar og viðurkennir fúslega að hafa gengist undir nokkrar fegrunaraðgerðir.
Manuela og Jón hafa áður tjáð sig um augnablikið þegar þau vissu að þau væru meira en dansfélagar. Fyrsta stefnumót þeirra var bíóferð, en Manuela bauð Jóni. Þau fara nánar út í þetta í þættinum.
„Ég var alltaf að bjóða honum á deit,“ segir Manuela.
„Ég var líka svolítið til baka sko, ég var svolítið hræddur við Ungfrú Ísland sko. Ekki endilega hræddur en þetta er Manuela Ósk skilurðu,“ segir hann við hlátursköll Völu Matt.
Vala Matt spyr Manuelu út í kjaftasögurnar og hvernig hún hefur breyst í útliti.
„Ég meina ég hef alltaf verið mjög opin. Ég er 18 ára gömul þegar ég vinn Ungfrú Ísland og strax þá byrjuðu sögurnar sem ég væri búin að láta gera svo mikið við mig, sem ég hef aldrei, það var ekkert. Þetta hefur alltaf fylgt mér,“ segir Manuela og heldur áfram.
„Þannig þessir litlu hlutir sem ég hef látið gera, sem mér finnst önnur hver kona á Íslandi vera að gera, það er einhvern veginn alltaf blásið upp.“
Manuela bætir við að auðvitað breytist fólk á áratugi eða tveim, en henni hefur aldrei liðið betur í eigin skinni.
„Ég hef alltaf verið opin um varafyllingar, sem er það helsta sem ég hef gert, og ég fer í bótox tvisvar á ári,“ segir hún. Hún segist líka hafa farið tvisvar sinnum í brjóstastækkun.
„En þegar það er verið að tala um einhverjar rosalegar breytingar þá stundum hristi ég bara hausinn og skil ekki alveg,“ segir hún.
