Vera Sigurðardóttir keypti fjögurra herbergja íbúð í Breiðholti í byrjun sumars. Hún og faðir hennar hafa gert íbúðina upp og haldið kostnaði í lágmarki. Þau sáu um alla vinnu að mestu en fengu einnig aðstoð frá fjölskyldunni og góðum vinum.
Vera starfar sem löggildur fasteignasali. Hennar ástríða er að koma heim til fólks og aðstoða það við stíliseringu fyrir myndatökur og einnig að gefa góð ráð. Hún segir að það þarf ekki alltaf að kosta mikil til að bæta og breyta.
Hún deilir með okkur alveg mögnuðum myndum af íbúðinni, bæði fyrir og eftir framkvæmdir. Fyrir áhugasama fer hún yfir allar framkvæmdirnar neðst í greininni.
Eins og fyrr segir sáu Vera og faðir hennar að mestu leyti um framkvæmdirnar. Hún fer yfir allt sem þau gerðu.
„Það var rifið út forstofuskápinn, veginn á milli eldhússins og stofunnar, gólfefni og gólfflísarnar á baðinu, einnig voru hurðir fjarlægðar. Svo fór afgangur af eldhúsinnréttingunni líka á haugana,“ segir hún.
„Við keyptum harðparket og gott undirlag frá Birgison, en listarnir voru keyptir í Bauhaus. Veggir, loft, eldhúsinnrétting og innihurðar er allt í sama lit. Málning á veggi og loft er Alphaacryl Pure Mat SF frá Sérefni, liturinn Linnea Sand.
Innrétting og hurðir voru málaðar með möttu Super finish Linnea Sand frá Sérefni. Gluggar og fataskápar lakkaðir með möttu Super Finish frá Sérefni, litur 8500. Þetta á ekki við um baðherbergið.
Allir tenglar voru teknir af, hreinsaðir vel og spreyjaðir. Fyrst með „primer“ og svo lit. Spreyið er frá Slippfélaginu og heldur sér alveg. Klósett, baðkar og allir ofnar voru tiltölulega nýlegir. Innihurðir voru keyptar notaðar, hurðarhúnar og gerefti var keypt í Húsasmiðjunni. Gerefti og hurðirnar voru svo grunnaðar og lakkaðar.
Eldhúsinnréttingin var tekin niður og efri skápum hent, innréttingin var grunnuð og lökkuð. Höldur keyptar hjá Höldum í Kópavogi, ný borðplata frá Fantofell, vaskur frá Ísleifi og blöndunartæki pantað erlendis frá og helluborð úr Elko.
Tókum flísarnar af baðherbergisgólfinu ásamt innréttingunni og öllum blöndunartækjum. Flísar á veggjum voru grunnaðar og málaðar. Flísar á gólfi voru keyptar hjá Húsasmiðjunni, innrétting og vaskur frá IKEA. Spegillinn var keyptur notaður og blöndunartæki fyrir vaskinn voru frá IKEA en keyptum erlendis frá á sturtuna og baðið. Glerið var pantað frá Ispan. Efniskostnaður við baðherbergið var um 200 þúsund krónur.“
Vera segir að efniskostnaður við upptalninguna vera um 1,2 milljón krónur og förgunarkostnaður á Sorpu er þar talinn með, sem var um 40 þúsund krónur.
