Listakonan Linda Jóhannsdóttir, eigandi Pastelpaper og fyrrum blaðamaður Hús og hýbíla, selur fallegt heimili sitt í Hlíðunum.
„Mávahlíðin loksins orðin 100 prósent eins og við vildum. Þykir óendanlega vænt um þessa íbúð,“ segir Linda á Instagram.
„Við keyptum hana þegar við vorum 21 árs, þá var hún ósamþykkt geymsluloft. Í dag er hún samþykkt, með fimm mjög stórum kvistum, suðursvölum, besta útsýnið í bænum, baðherbergi drauma minna og dásamlega sál. Líður hvergi jafn vel og hér! En það eitt verkefni klárast bíða önnur og er þessi elska því á leiðinni á sölu,“ segir Linda.
Það er heldur betur stórt verkefni sem bíður Lindu. Í viðtali við DV fyrr á árinu sagðist hún hafa keypt íbúð sem hafði ekki verið snert í 72 ár. Íbúðin hafði verið í eigu sömu fjölskyldunnar frá því að hún var byggð.
Linda hefur verið dugleg að leyfa fylgjendum sínum á Instagram að fylgjast með ferlinu.
Íbúðin í Mávahlíðinni, sem er auglýst á fasteignavef Vísis, er sannkallað pastel himnaríki. Íbúðin var töluvert endurnýjuð árið 2008 og öllu innra skipulagi breytt. Þá var jafnframt eldhús, baðherbergi, gluggar og fleira endurnýjað. Íbúðin hefur fengið gott viðhald í gegnum árin og fékk baðherbergi sem og hurðar yfirhalningu á árinu 2020.
Íbúðin er rúmlega 86 fermetrar og á þriðju hæð. Það eru þrjú herbergi og eitt baðherbergi. Það eru 49,8 milljónir settar á eignina.
Sjáðu myndir af þessari fallegu og björtu íbúð hér að neðan.
Þú getur séð fleiri myndir hér.