„Í hvert sinn sem stúlka á aldrinum 20-50 ára setur inn mynd af sér á samfélagsmiðli keppast vinkonurnar við að hæla útlitinu,“ segir Haukur Örn Birgisson hæstaréttarlögmaður í pistli á vef Fréttablaðsins.
Haukur segir að samkvæmt niðurstöðum „afar óvísindalegrar rannsóknar“ hans á samfélagsmiðlum sé konum umhugað um útlit vinkvenna sinna og tengir hann það við slæma líkamsímynd kvenna. Hann tekur það fram að hann efist ekki um að karlar hugsi einnig um útlitið en það beri minna á því.
„Í hvert sinn sem stúlka á aldrinum 20-50 ára setur inn mynd af sér á samfélagsmiðil keppast vinkonurnar við að hæla útlitinu. „Fallegust“, „sæta mín“ og „sæta, sæta“ sést gjarnan við þessi tilefni. Þetta er hið besta mál og sprottið af velvilja einum saman,“ segir hann og bætir við að það sem vekur athygli hans er að strákar gera þetta ekki, að hans sögn.
„„Þú ert sætastur“ eða „fallegi vinur minn“ eru athugasemdir sem ég hef aldrei séð á Facebook-veggjum vina minna og eru þeir þó langt frá því að vera allir ljótir. Yfirlýsingin „flottur!“ er eins langt og nokkur gaur er tilbúinn að ganga í þessum efnum,“ segir Haukur.
Haukur tengir síðan þessa hefð kvenna við slæma líkamsímynd stúlkna.
„Reglulega birtast fréttir þess efnis að líkamsmynd stúlkna fari versnandi. Það er alls ekki gott að heyra og mikilvægt að sporna gegn því. Orsakirnar eru líklegast margvíslegar en þær stafa ekki síður frá konum en körlum. Konur gera glæsilegt útlit annarra kvenna að umtalsefni, ekki síður en karlar. Jafnvel oftar. Á sama tíma og fullyrt er að útlit kvenna eigi ekki að skipta máli keppast konur við að hrósa hver annarri fyrir útlitið,“ segir Haukur og spyr sig af hverju það sé.
„Þótt um hrós sé að ræða, getur verið að fókusinn á fegurðina eigi sinn þátt í versnandi sjálfsmynd? Og hvað gerist þegar hrósin eru ekki nógu mörg eða þau hætta að berast? Það kann að vera óþægilegt að horfast í augu við það en líklegast erum við lent í vítahring.“
Hvað segja lesendur?