Illugi Jökulsson, rithöfundur og fjölmiðlamaður, er á leið í hjartaþræðingu – þá níundu í röðinni. Hann greinir sjálfur frá þessu á Facebook-síðu sinni þar sem hann lýsir þrekleysi undanfarna mánuði.
„Fyrir sex mánuðum var ég í fínu formi, synti 2 kílómetra á hverjum morgni og gat léttilega synt 10 ef ég nennti. Þá var sem ég rækist á vegg, þrekið hrundi og nú verð ég móður og másandi við að ganga upp stiga á aðra hæð, verð lítið sem ekkert úr verki og er bara sem hálfur maður,“ segir hann.
Illugi segist þekkja þetta því æðarnar í kringum hjartað hneigist til að stíflast og nefnir Illugi að hann hafi farið í átta hjartaþræðingar fram að þessu.
„Nú er komið að þeirri níundu og eftir að sjá hvort hún skili árangri. Athugið að þessi aðgerð er smávægileg og nákvæmlega ekkert hættuleg á neinn hátt. Þetta er færibandavinna fyrir okkar færa heilbrigðisstarfsfólk. Ég verð því kominn á ról eftir öfáa tíma. Eina spurningin er hvort þetta dugi til að endurheimta þrekið. Ég vona það.“
Fókus óskar Illuga skjóts bata eins og fjölmargir vina hans og vandamanna á Facebook.