Það hefur líklegast ekki farið framhjá neinum að úrslit Söngvakeppninnar ráðast á laugardagskvöldið næsta, þegar að fimm flytjendur keppast um að verða fulltrúi Íslands í Eurovision í Ísrael í maí.

Margir telja að sigurstranglegustu flytjendurnir séu Hatari og Friðrik Ómar. Daði Steinn Jónsson birtir forvitnilegan pistil í hópnum Júróvisjón 2019 og hefur gefið DV góðfúslegt leyfi til að birta hann. Í pistlinum útskýrir hann fyrir landsmönnum af hverju þeir verða að kjósa Hatara á laugardaginn.

„Vildi helst sleppa því að skrifa þetta en eftir að hafa lesið umræðuna í þessari grúbbu þá hef ég ákveðið að taka „real talk“ og eitt „one for the team“ á mig fyrir okkur fólkið með smá „common sense“,“ skrifar Daði og heldur áfram.

„Flott lög í keppninni (samt ekki, er bara að reyna að vera jákvæður), en elsku Íslendingar hvernig væri að kjósa Hatara? Restin er ekki að fara neitt áfram í keppninni hvort sem ykkur líkar það eða ekki, hin lögin eru einfaldlega fyrirsjáanleg, einföld og skera sig 0 út frá hinum. Mér gæti ekki verið meira sama þótt þér líki ekki við lagið, hárgreiðslu, framkomu eða hversu oft meðlimir Hatara fara í kirkju, sannleikurinn er einfaldur, við erum frekar ofarlega í veðbönkum útaf laginu frá Hatara og það hefur sannað sig á áhorfum og viðtökum erlendis frá.“

Þá les hann yfir þeim sem ætla að kjósa eitthvað annað en Hatrið mun sigra á laugardagskvöld.

„Allir þeir sem ætla sér að kjósa eitthvað annað en lagið hjá Hatara eru einfaldlega að senda lag sem tekur þátt til þess að taka þátt en ekki til þess að komast sem lengst, ekki kjósa plís, klappaðu fyrir laginu heima, farðu í kjól að dansa húla húla og farðu svo í vinnuna daginn eftir og hlustaðu á það á Youtube. Fyrirfram þakkir.“

Pistillinn hefur uppskorið yfir hundrað læk í grúbbunni og eru margir sem eru algjörlega sammála Daða.