Jón Viðar Jónsson, helsti leikhúsgagnrýnandi þjóðarinnar til fjölda ára, hefur oftast verið þekktur fyrir harða gagnrýni. Hann er ekki par sáttur með endurkomu þingmannanna, Gunnar Braga Sveinssonar og Bergþórs Ólasonar, sem áttu í hlut á Klaustur bar á hinu örlagaríka kvöldi í seinni hluta nóvembermánaðar síðasta árs.

Jón segir í færslu sinni á Facebook að endurinnganga „Klaustursbræðranna“ á Alþingi sé vísbending um meiriháttar siðrof í samfélaginu.

„Ef þjóðin sýnir engin viðbrögð við því önnur en að fjargviðrast hér á Facebook, er eitthvað í meira lagi að siðferðisvitund okkar,“ segir hann. „Þessir menn kunna ekki að skammast sín og oftast er það vandi þess sem ekki hefur sómatilfinningu til slíks, en í þessu tilfelli er það vandi okkar sem látum þá komast um með það orðalaust!“

Þá merkir hann Hörð Torfason söngvaskáld og spyr: „Er ekki ráð að mæta á Austurvöll á laugardaginn og láta í okkur heyra og þið hin sem hafið af dugnaði og fórnarlund leitt þjóðarsamviskuna síðustu misserin?“