Bandaríski stórleikarinn Kevin Spacey er nú til rannsóknar í tveimur löndum vegna ásakana um kynferðisbrot.
Saksóknaraembættið í Los Angeles staðfesti við Hollywood Reporter að lögregla hefði nýlega sent mál til ákærumeðferðar er varðar meint brot Spacey gegn karlmanni árið 1992. Þá greinir breska blaðið Guardian frá því að breska lögreglan rannsaki nú ásakanir þriggja karlmanna þess efnis að Spacey hafa brotið gegn þeim í London á árunum 2005 til 2008.
Breska ríkisútvarpið, BBC, segir að rúmlega 30 karlmenn hafi stigið fram og saki Spacey um kynferðislega áreitni eða kynferðisbrot.
Spacey, sem hefur unnið til tveggja Óskarsverðlauna ferli sínum, var nýlega rekinn úr þáttunum vinsælu House of Cards eftir að ásakanir gegn honum komust í hámæli. Þá stóð til að Spacey léki eitt af aðalhlutverkum myndarinnar All the Money in the World en hann var klipptur út úr myndinni á síðustu stundu.
