Tónlistarhátíðin Secret Solstice verður haldin dagana 21.-23. júní 2019 í Reykjavík, en ákveðið hefur verið að fyrirtækið Live Events ehf. taki við skipulagningu og framkvæmd hátíðarinnar í kjölfar skuldauppgjörs við fyrrum rekstraraðila hátíðarinnar.
Nýr framkvæmdastjóri hátíðarinnar er Víkingur Heiðar Arnórsson, en hann hefur mikla reynslu úr tónlistarheiminum og hefur getið sér gott orð fyrir skipulagningu viðburða og skemmtistaðarekstur.
„„Það er fagnaðarefni fyrir alla tónlistarunnendur að tekist hafi að tryggja framtíð Secret Solstice tónlistarhátíðarinnar. Markmiðið er að gera góða hátíð betri og búa til þannig jarðveg að tónlistarhátið sem þessi geti gengið í Reykjavik til frambúðar,“ segir Víkingur Heiðar í samtali við DV.
Gerðir hafa verið nýir styrktarsamningar við samstarfsaðila auk þess sem gott samtal hefur átt sér stað við fulltrúa Reykjavíkurborgar. „Í samráði við Reykjavíkurborg hefur verið ákveðið að breyta uppsetningu hátíðarinnar. Hátíðardögum verður fækkað í þrjá, miðaverð lækkað, ásamt því sem dagskráin í Laugardalnum mun klárast klukkan 23:30,“ segir Víkingur Heiðar.
Þá verður dagskráin sniðin að dreifðari mark- og aldurshópi en áður hefur verið. Einnig er gert ráð fyrir að á aðalhátíðarsvæðinu verði fleiri svið sem gefur möguleika á fjölbreyttari dagskrá. Þá hefur verið ákveðið að öll næturdagskrá verði gerð í samstarfi við skemmtistaði í miðbæ Reykjavíkur og ekki verði nein næturdagskrá í Laugardalshöll.
