Friends þættirnir eru klassík, þættirnir gengu í tíu ár og eru með bestu og vinsælustu þáttum allra tíma. Fjórtán árum eftir að þeir hættu í sýningum í sjónvarpi eru þeir enn eftirsóttir þökk sé Netflix og öðrum efnisveitum, auk þess sem frasar og brandarar úr Friends lifa góðu lífi.

Það er líklega búið að stúdera þættina í öreindir og núna hafa aðdáendur bent á lítið atriði, sem útskýrir samt af hverju Rachel og Ross eiga í sambandsvandræðum.

Í þætti eitt sem var sýndur fyrst 22. september 1994 sést hvar Ross opnar regnhlíf fyrir framan Rachel, sem kallar á sjö ára ógæfu fyrir þau.

Í þætti 173, sem var sýndur 27. september 2001, segir Rachel Ross að hún eigi von á barni hans. Það er næstum upp á dag sjö árum eftir regnhlífaatvikið, eða þegar álögum þeirra var aflétt (að sögn aðdáenda).

Það var Reddit notandinn Smoothmotives sem kom fram með þessa kenningu og eru aðdáendur gjörsamlega að elska hana.

„Þetta er uppáhalds aðdáendakenning mín í langan tíma,“ skrifar einn.

Annar segir: „Ef þetta er rétt, þá eru þetta bestu skrif þáttanna í heild.“