Leikkonan María Birta Bjarnadóttir leikur hlutverk Playboykanínu í nýjustu mynd Quentins Tarantino, Once Upon A Time in Hollywood. Fréttablaðið greinir frá.
Myndin fjallar um morðið á Sharon Tate sem Manson-klíkan framdi.
Fjölmargar ofurstjörnur Hollywood leika í myndinni: Margot Robbie mun leika Tate og Leonardo DiCaprio og Brad Pitt leika félagana Cliff Booth og Rick Dalton sem búa við hlið Tate í Hollywood.
„Ég fékk þann mikla heiður að fá að taka þátt í þessu meistaraverki og er búin í tökum,“ segir María Birta.
Á vef IMDb kemur fram að María muni leika Playboy-kanínu ásamt þeim Natalie Cohen, Kerry Westcott og Courtney M. Moore, sem hafa allar farið með smáhlutverk í nokkrum stórmyndum.
Fleiri þekktir leikarar verða í myndinni, þar á meðal Dakota Fanning, Kurt Russell, Al Pacino, Timothy Olyphant, Lena Dunham, Luke Perry, Tim Roth og Damian Lewis, auk þeirra reglulegu gesta sem leika í myndum Tarantinos. Rumer Willis, dóttir Bruce Willis og Demi Moore, og Maya Hawke, dóttir Umu Thurman og Ethans Hawke, fara einnig með hlutverk.
