Misnotkun lyfseðilsskyldra lyfja er faraldur á Íslandi, og í dag gaf Minningarsjóður Einars Darra út sitt þriðja forvarnarmyndband þar sem minnt er á þá óhuggulegu staðreynd.
„Það er okkar tilfinning að það er aukning í andlátum ungs fólks,“ segir Ragnar Jónsson lögreglufulltrúi í Reykjavík, „þetta kemur í bylgjum og í dag eru það læknalyfin.“
„Það er talað um þetta eins og þú getir ekki gert neitt, nema taka Xanax,“ segir Jóhanna Björt Grétarsdóttir 19 ára nemandi við Framhaldsskóla Mosfellsbæjar. „Það halda allir að þeir höndli þetta, en það er ekki þannig,“ segir Júlía Sif Sundby 18 ára nemandi í Borgarholtsskóla.
Auk þess er talað við Örn Arnarsson grunnskólakennara í Heiðarskóla, Freydísi Óskarsdóttur 18 ára og Sesselju Rós Guðmundsdóttur 19 ára, nemendur við Fjölbrautarskóla Vesturlands, Róbert Orra Vignisson 21 árs taktsmið og Valgerði Rúnarsdóttur forstjóra sjúkrahússins Vogs.
Myndbandið er þriðja myndbandið af nokkrum sem Minningarsjóður Einars Darra mun gefa út.
