Guðni Aðalsteinsson, forstjóri fasteignafélagsins Reita, hefur áhuga á að útvíkka starfsemi félagsins og sér framtíðina fremur sem vettvang þekkingar- og þróunarfyrirtækis, sem tekur til sín stærri hluta virðiskeðjunnar en nú. Í þessu sambandi horfir hann til Norðurlandanna og víðar þar sem starfsemi fasteignafélaga er fjölbreyttari en hér á landi. Hann segir fasteignafélög hér á landi hafa byggst upp í kringum eignir sem urðu nokkurn veginn munaðarlausar í hruninu. Guðni er gestur Ólafs Arnarsonar í hlaðvarpi Markaðarins
Hér er hægt að hlusta á brot úr þættinum:
„Ég byrja svona eftir háskólann sem hagfræðingur í forvera Samtaka atvinnulífsins og vann þar sem hagfræðingur í nokkur ár og langaði svo til að spreyta mig í útlöndum og kemst í ágæta skóla þar sem ég tek MBA-próf og í framhaldi af því fer boltinn að rúlla og ég hef mikinn áhuga á bankastarfsemi og renn inn í það í London hjá Lehman Brothers og er þar og svona mín tíð hefur mikið verið í bankastarfsemi, það er búið að vera grunnurinn að minni reynslu og starfsemi. Og svo eins og ég segi, maður bara passar hvað maður biður um og óskar eða óskar ekki. Ég man þegar ég kláraði stúdentsprófið þá var það sem ég gladdist mest yfir var að ég þyrfti aldrei að tala eða ræða þýsku aftur, það var ekki uppáhaldsfagið mitt. En viti menn, hjá Lehman er ég beðinn að fara yfir á skrifstofuna í Þýskalandi og taka þátt í uppbyggingu hennar þannig að það endaði með því að við fluttum þangað og áttum nokkur frábær ár í Þýskalandi.
Nú síðan hef ég aftur unnið í London og alltaf í bankastarfsemi, hef verið í einu stærsta eignastýringarfyrirtæki og tryggingafyrirtæki, Legal & General í Englandi, var þar í nokkur ár, og svo æxlaðist það til þannig að ég fer til Katar af öllum stöðum og var þar bankastjóri í alþjóðlegum banka og en svo ákváðum við hjónin fyrir rúmum tveimur árum að nú væri komið nóg og ég fer til Íslands og er forstjóri Reita, þannig að þetta er búið að vera mikil og mjög skemmtileg vegferð að fá að prófa að búa í mismunandi löndum, Englandi og Þýskalandi og Katar og sjá svona hvað það eru mörg blæbrigði þarna úti.“
Já, þetta er nefnilega, það er bara hollt og þroskandi að kynnast öðrum menningarheimum.
„Já, það hjálpaði manni held ég svolítið líka bara að finna hvernig maður nær hlutum áfram því að landslagið er svo ólíkt og þetta fer svona bara í reynslubankann og nýtist líka hér heima líka.“
Já, en svo kemurðu hingað heim, eins og þú segir, og tekur við sem forstjóri Reita, sem er skráð félag, þetta er fasteignafélag sem náttúrlega þýðir að þetta er félag sem á fasteignir. En hvað gerir fasteignafélag? Hvernig virkar fasteignafélag?
„Góð spurning, Ólafur, því að menn leggja mismunandi skilgreiningu í þetta. Nú, fasteignafélögin íslensku voru þannig að þau voru stofnuð svona um eignasöfn sem urðu, ja, hálfpartinn olnbogabörn eftir hrunið, þannig að þau urðu til svona eignastýringarfélög og svoleiðis félög eru til á mörgum stöðum erlendis, nokkurs konar sjóðir. En félögin eru hlutafélög og verða kringum þetta en það er hægt að skilgreina fasteignafélög með mismunandi hætti og þegar ég tek við fyrir tveimur árum þá legg ég svolítið upp úr því að breyta skilgreiningunni. Við erum stærsta fasteignafélag landsins. Við erum með um 500.000 fermetra í útleigu, atvinnuhúsnæði …“
Þið eruð bara í atvinnuhúsnæði?
„Við erum bara í atvinnuhúsnæði, erum reyndar núna með lóðir til að byggja íbúðir. En við höfum svolítið verið að hugsa um útvíkkun á starfseminni og það er alveg hægt að líta á svona félög sem einhvers konar sjóð sem fær lánað af markaði, kaupir eignir og leigir út og þannig verður til margína. En það er líka hægt að hugsa sér þetta sem þekkingar- og þróunarfyrirtæki og það er svolítið þessi áhersla sem ég hef lagt upp með. Það kemur í ljós, ef við berum okkur saman við nágrannalöndin og meginland Evrópu, að þau félög, þau fasteignafélög sem hefur vegnað hvað best eru kannski ekki bara þau félög sem eru eignastýringarfélög heldur eiga stærri hlut í virði sínu, eru sannkölluð þekkingar- og þróunarfélög og þá á ég við að þau eru þá í fasteignaþróun, þau eru í sérhæfðum fasteignum, þau taka stærri hluta af keðjunni. Sumir eru meira að segja í rekstri, sumir eru að sjá um uppbyggingu og framkvæmdir og þetta er það sem hefur skilað fyrirtækjunum á Norðurlöndunum sérstaklega áfram. Og það hefur svona með það í farteskinu hvað er að virka best erlendis, þá hefur maður svolítið verið að máta við hvað endurspeglar þann raunveruleika á Íslandi og það er og mun vera áframhaldandi vöntun á atvinnuhúsnæði og uppbyggingu, það er bara þannig samfélag sem við búum í.“
Hægt er að hlusta á hlaðvarpið í heild sinni hér:
Einnig er hægt að hlusta á Spotify.
