„Miðað við hugmyndir Samfylkingar um aukna skattheimtu, miðað við hugmyndir um aukin veiðigjöld og svo framvegis, þetta dregur auðvitað úr mætti hagkerfisins og þannig úr ráðstöfunarfé heimilanna,“

segir Heiðar Guðjónsson hagfræðingur sem er nýjasti gestur Spjallsins með Frosta Logasyni.

Heiðar, sem er fyrrum forstjóri Sýnar og stjórnarformaður fyrirtækisins árin 2014-2019, segir  Kristrúnu, sem er menntaður hagfræðingur, ætla að leiða ríkisstjórn væntanlega vinstri manna. Segir hann Kristrúnu ekki jafn róttæka vinstri og Steingrímur J. Sigfússon og Jóhanna Sigurðardóttir eru. „Þannig að það getur vel verið að hún fari betur með fé almennings, fé annarra.“

Segir hann stjórnlynda hagfræðinga vera stórhættulega, „það eru þeir sem ætla að skipuleggja hagkerfið, ekki út frá reglum heldur út frá geðþótta, þeir ætla að velja fyrir hönd fólks, þeir ætla að taka sjálfsákvörðunarréttinn af fyrirtækjum, af einstaklingum. Þannig að hagfræðingar geta sannarlega verið gereyðingarvopn, en þeir geta líka verið mjög góðir. Ég hef alltaf mjög mikinn fyrirvara á vinstri sinnuðum hagfræðingum vegna þess að þeir geta valdið ómældum skaða. Með því að ofmeta sjálfa sig, þeir eru svo klárir, þeir eru svo upplýstir, þeir eiga bara að stjórna, en það er engin ein manneskja hversu gáfuð sem hún er, sem getur bara ein og sér stjórnað.“

Heiðar segir að þess vegna sé til kapítalískt kerfi, „þar sem lýðræði og kapítalismi fari saman þar sem hver stjórnar út frá eigin forsendum hverju sinni, hver einn og einasti í kerfinu og það býr til miklu meiri velmegun og réttlátara samfélag.“

Segir hann betra að bjóða upp á jöfn tækifæri. „Auðvitað eru ekki allir jafn góðir í öllu, en að allir fái að minnsta kosti tækifæri til að blómstra. Hvernig þeir síðan vinna úr sínum tækifærum, þú þarft svolítið að bera ábyrgð á því. Það er ekki hægt að kasta þeirri ábyrgð á alla aðra. Þess vegna hef ég ekki trú á jafnri útkomu en ég hef trú á því að reyna að jafna tækifærin.“