Sjálfstæðismenn saka meirihlutann í borginni um óstjórn í fjármálum en virðast ekki vilja viðurkenna að óreiðan í fjármálum ríkisins er margfalt verri, skrifar Ólafur Arnarson, sem heldur á penna Dagfara á hringbraut. Hann segir núverandi og fyrrverandi borgarfulltrúa Sjálfstæðisflokksins senda reglubundið frá sér innistæðulausar árásir á borgarstjórnarmeirihlutann.

Hann segir nýjustu grein Vilhjálms Þ. Vilhjálmssonar, fyrrverandi borgarstjóra, vera slíka að ætla mætti að hún fjallaði um stjórn ríkisfjármála sem hafa verið á hendi sjálfstæðismanna nánast óslitið frá árinu 1991, ef frá er skilinn tími ríkisstjórnar Jóhönnu Sigurðardóttur 2009-2013. Allan þann tíma hafi verið halli á fjárlögum og lengst af á þessum tíma hafi Bjarni Benediktsson verið fjármálaráðherra. Ekki sé um að ræða lítinn halla heldur mörg hundruð milljarða á ári hverju.

Ólafur tekur að sjálfstæðismenn ættu að líta sér nær og byrja á stóra fílnum í postulínsbúðinni og tala um fjárlagahalla ríkissjóðs undir forystu flokksins. „Sveitarfélögin hafa mörg hver verið rekin með nokkrum halla á undanförnum árum vegna þess að ekki hefur tekist að ljúka við réttláta skiptingu tekna ríkis og sveitarfélaga til að mæta þeim auknu útgjöldum sem sveitarfélögin hafa þurft að taka við af ríkinu.“

Ólafur bendir á að tekjuskipting milli ríkis og sveitarfélaga taki ekki mið af raunverulegri verkaskiptingu þar á milli. „Sveitarfélögin á höfuðborgarsvæðinu hafa öll þurft að fást við þennan vanda, þar á meðal Kópavogur, Hafnarfjörður og Garðabær, sem öll lúta nú stjórn Sjálfstæðisflokksins, að ekki sé minnst á Seltjarnarnesbæ sem Sjálfstæðisflokkurinn hefur stýrt alla tíð. Þar eru meðaltekjur hvað hæstar á landinu en bærinn hefur samt verið rekinn með halla síðustu sjö árin undir óreiðukenndri forystu Sjálfstæðisflokksins.“

Ólafur rifjar upp að Vilhjálmur gegndi embætti borgarstjóra um skeið með sóma en var stunginn í baki af flokksfélögum sínum. Hann veltir fyrir sér hvort einhver vilji vinna með þeim flokki sem stakk sinn eigin borgarstjóra í bakið.

Dagfara í heild má lesa hér.