Orðið á götunni er að Birgir Ármannsson, forseti Alþingis, þurfi mögulega að íhuga stöðu sína eftir að Mannréttindadómstóll Evrópu komst að þeirri niðurstöðu að íslenska ríkið hafi brotið gegn rétti borgara til frjálsra kosninga með því að Alþingi staðfesti seinni talningu Inga Tryggvasonar, formanns kjörstjórnar, eftir að hann hafði látið hjá líða að tryggja öryggi kjörseðla milli talninga.
Birgir, sem var kjörinn forseti Alþingis eftir þessar „ólöglegu“ kosningar/talningu, beitti sér af hörku fyrir því að ekki yrði í neinu hlustað á eða tekin til greina rök þeirra sem bentu á að fyrri talningin skyldi gilda enda væri óumdeilt að sú talning hefði farið fram á kjörseðlum sem komu beint úr innsigluðum kjörkössum á meðan kjörseðlarnir höfðu legið fyrir hunda og manna fótum í hálfan sólarhring áður en seinni talning fór fram.
Orðið á götunni er að það geti vart talist hafið yfir gagnrýni að forseti þings, með slíkan áfellisdóm á sér, sitji áfram í sínu embætti eins og ekkert sé. Nýleg dæmi séu um það hér á landi að fólk hafi þurft að flytja sig um set eftir áfellisdóma frá léttvægari aðilum en Mannréttindadómstól Evrópu.
