Ég starfaði um nokkurt skeið sem heilsugæslulæknir í Grindavík. Um árabil kom ég til bæjarins á föstudagsmorgnum og sinnti heilsufari bæjarbúa. Grindvíkingar eru sérlega æðrulaust fólk enda hefur lífsbaráttan um aldir verið erfið. Haugabrim hefur löngum verið úti fyrir ströndum, grýtt lending og saltur stormur vælir í hrauninu kringum bæinn. Íbúarnir, stórhentir menn, svipmiklar konur og tápmikil börn. Byggð hefur verið í Grindavík allt frá landnámsöld þegar Molda-Gnúpur settist þar að. Sonur hans var gæfumaðurinn Hafur-Björn sem gerði samning við bergrisa og landvætti sem sáu til þess að hann varð allra manna auðugastur.

Skálholtsstaður eignaðist smám saman flestallar stórjarðir í Grindavík og gerði út báta til fiskjar. Lífsbaráttan var erfið og hættuleg og fjölmörg sjóslys og skipstapar á Suðurnesjum. Á föstudaginn seinasta í Góu árið 1700 fórust 129 sjómenn svo að þá hafa verið daprir dagar í Grindavík.

Á síðustu öld óx og dafnaði Grindavík eins og aðrar verstöðvar á landinu. Bærinn var eins og Íslandssagan í hnotskurn með blússandi góðæri og mannskaðavetrum til skiptis. Þegar Hriflu-Jónas barðist við Læknafélagið á árunum í kringum 1930 skipaði hann Sigvalda Kaldalóns sem lækni í Keflavík í trássi við samtök lækna. Hann var rekinn úr læknafélaginu og Sjálfstæðismenn meinuðu honum búsetu í Keflavík. Grindvíkingar brugðust við af venjulegum stórhug og byggðu hús yfir tónlistarmanninn. Merkilegasti hluti tónlistarsögu Kaldalóns var skráður í Grindavík en Keflvíkingar sátu uppi með herinn og allt bullið kringum hann. Annað menningarframlag var ólíkindaskáldið og snillingurinn Guðbergur Bergsson.

Ég fylgist eins og aðrir með baráttu Grindvíkinga við jarðhræringar og eldgos. Auðvitað munu þeir hafa betur í þeim slag. Bæjarbúar hafa tekist á við náttúruöflin í ellefu hundruð ár og alltaf borið hærri hlut. Hafur-Björn vakir yfir þessu samfélagi ásamt öllum sínum landvættum og bergrisum.