Benedikt Jóhannesson, stofnandi og fyrrverandi formaður Viðreisnar og fjármálaráðherra fer yfir pólitíkina á árinu sem er að líða í grein á Kjarnanum um helgina og beinir þar orðum sínum að meirihlutanum í Reykjavík, sem Viðreisn tilheyrir.

Benedikt gagnrýnir meirihlutann harðlega og nefnir að eina ástæðu þess að borgarstjórar Sjálfstæðisflokksins hafi verið vinsælir fyrr á tímum, jafnvel hjá pólitískum andstæðingum:

„Þeir settu sig inn í vanda borgarbúa og gerðu sér far um að leysa hann.“

Alltaf sama svarið

Benedikt segir annað upp á teningnum hjá núverandi meirihluta:

„Í Reykjavíkurborg samtímans virðist oft að stjórnendur borgarinnar skapi vandamálin og reynist svo ófærir um að leysa þau. Á hverjum einasta degi kynnast tugþúsundir borgarbúa óstjórninni á umferðarljósum þar sem græn bylgja, sem áður var reglan hjá þeim sem keyrðu á löglegum hraða, heyrir sögunni til og rauð plága hefur tekið við. Borgin anar út í framkvæmdir, án þess að nokkur hafi hugmynd um hvenær eða hvort þeim lýkur. Þegar spurt er um lausn er svarið alltaf það sama, óháð því hver spurningin er: Borgarlína.”

Kominn tími á breytingar

Benedikt segir að nú hljóti að fara að sjást árangur þess að Viðreisn kom að myndun meirihlutans, en í þeim orðum felst mikil gagnrýni á þau Þórdísi Lóu Þórhallsdóttur og Pawel Bartoszek, borgarfulltrúa Viðreisnar:

„Þegar Viðreisn gekk til samninga um myndun meirihluta var áskilið að gerð yrði úttekt á stöðu og rekstri borgarinnar og í kjölfarið ráðist í umbætur. Það er eitt og hálft ár frá kosningum og nú hlýtur umbótaskeiðið að fara að renna upp.”

Þá baunar Benedikt einnig á minnihlutaflokkana:

„Engum dettur í hug að lausn á vandanum liggi hjá núverandi minnihlutaflokkum, þríklofnum borgarstjórnarflokki Sjálfstæðismanna og þremur popúlistabrotum.”