Boeing verksmiðjunum hefur verið gert af bandarískum loftferðayfirvöldum að rannsaka sprungumyndanir í nokkrum 737 NG farþegaþotum félagsins sem fundust við endurbætur á þotu sem var mjög mikið notuð.
Rannsóknin nær ekki til MAX vélanna sem enn eru í flugbanni, en öllum rekstraraðilum NG vélanna hefur verið gert viðvart.
Ekki er vitað um fjölda véla né hvar sprungurnar fundust, en Morgunblaðið greinir frá þessu í dag, sem og nefnir að samkvæmt heimasíðu Boeing sé Icelandair meðal kaupenda þessarar gerðar af þotum.
Ekki hjá Icelandair
Jens Þórðarson, framkvæmdastjóri rekstrarsviðs Icelandair, sagði hinsvegar við Eyjuna að engar slíkar þotur væru í notkun hjá þeim:
„Við keyptum og seldum nokkrar svona vélar fyrir mörgum árum, en höfum ekki rekið þær. En flugheimurinn fer gegnum mörg svona mál á ári þar sem eitthvað nýtt finnst við viðhald á vélum og gripið er til fyrirbyggjandi aðgerða í framhaldi,“
sagði Jens.
