Seðlabankastjóri veit ekki hvort útreikningarnir í Samherjamálinu séu réttir eða rangir

Már Guðmundsson, er í ítarlegu viðtali við Viðskiptamoggann í dag. Þar segist hann ætla að svara þungum ásökunum umboðsmanns Alþingis varðandi gjaldeyriseftirlit Seðlabankans, sem komst í fréttir vegna Samherjamálsins svokallaða, fyrir stjórnskipunar- og eftirlitsnefnd. Aðspurður hvort ummælin séu ekki óheppileg fyrir Má og Seðlabankann segir Már að aðeins önnur hliðin hafi heyrst í málinu:

„Hlustaðu á það sem ég mun segja þegar ég kem fyr­ir nefnd­ina. Ég mun fara í gegn­um öll efn­is­atriði máls­ins og þau eru ekki öll eins og sýn­ist þegar þú ert bara bú­inn að fá hlið umboðsmanns á mál­inu. Hann er að hluta til með þung­ar ásak­an­ir í garð bank­ans og þið hafið aðeins heyrt ásak­an­irn­ar en ekki skýr­ing­ar þess sem ásakaður er. Ég mun fyr­ir nefnd­inni gera grein fyr­ir þeim.“

Ekki skoðað útreikningana

Már segist ekki hafa skoðað útreikningana sem lagðir voru til grundvallar húsleitinni hjá Samherja á sínum tíma, en því hefur verið haldið fram að þeir séu rangir og virtist Már taka undir þá skoðun í símtali við forstjóra Samherja, Þorstein Má Baldvinsson.

Um þetta segir Már að hann geti sig lítið tjáð, þar sem um ólöglega upptöku á símtalinu hafi verið að ræða og hann geti ekki tjáð sig um einstaka þætti máls.

Aðspurður hvort útreikningarnir hafi verið rangir segir Már:

„Ég get ekk­ert full­yrt um það. Ég hef ekki skoðað þessa út­reikn­inga síðan þetta mál kom upp. Segj­um sem svo að það hafi komið í ljós að þeir hafi ekki verið rétt­ir þá verður að taka til­lit til þess að svona mál bygg­ir ekki bara á út­reikn­ingi af þessu tagi og að ferlið fór eft­ir þeim leik­regl­um sem um það gilda. Það er ekki hægt að ráðast í hús­leit af þessu tagi nema fyr­ir at­beina dóm­stóla.“

Þá er Má bent á að það hljóti að varða orðspor bankans og úrslit málsins hvort útreikningar bankans séu réttir:

„Hvort sem hann var rétt­ur eða ekki, hefðum við kært málið til lög­reglu á grund­velli þessa út­reikn­ings? Nei, það hefði þurft ná­kvæm­ari út­reikn­inga til þess,“

svarar Már.

Aðspurður hvort það sé ekki óþægilegt að fá harða gagnrýni á störf sín frá bankaráði Seðlabankans segist Már hafa gengið í gegnum ýmislegt í lífinu og það sé nú eins og það sé:

„Bankaráðið hef­ur verið með ýms­um hætti á und­an­förn­um árum og ég skrifa kannski um það í ævi­sög­unni.“

Kaupþingsskýrslan

Þá segir Már að skýrsla Seðlabankans um neyðarlánið til Kaupþings í aðdraganda hrunsins 2008, verði birt þann 30. apríl, en hún átti að koma út fyrst árið 2015.