Ásmundur Friðriksson, þingmaður Sjálfstæðisflokksins, hefur gengið í lið með Klausturbræðrum, þeim Sigmundi Davíð Gunnlaugssyni, Ólafi Ísleifssyni og Karli Gauta Hjaltasyni og er meðflutningsmaður þeirra að tillögu um að Alþingi taki eignarnámi Landsímahúsið við Austurvöll.

Tillagan er lögð fram í því skyni að standa vörð um þinghelgi, en fjórmenningarnir hafa áhyggjur af því að hótelbygging á Landsímareitnum muni raska henni.

Um slíkt hefur vissulega verið deilt í gegnum tíðina. Einn þingforseti, sem nú er horfinn af þingi, var meira að segja þeirrar skoðunar að Alþingi ætti að hafa skipulagsvald í allri Kvosinni.

En það gæti verið athyglisvert að fara þarna niðureftir með stórt málband. Þá myndi hugsanlega koma í ljós að styttra – eða álíka langt – sé á Klausturbarinn og á fyrirhugaða hótelbyggingu.

Kannski mætti líka taka Klausturbarinn eignarnámi – vegna ónæðis sem hann veldur á Alþingi?

Svo má reyndar benda á að hinum megin við Austurvöll stendur annað hótel og hefur gert síðan 1930 – það er Hótel Borg.

Alþingi er reyndar býsna frekt til fjörsins í Miðbænum. Starfsemi þess hefur stöðugt þanist út í fleiri og fleiri byggingar. Skrifstofur eru í ýmsum nærliggjandi götum, til að mynda hefur hluti þingliðsins skrifstofur í næsta húsi við nektardansstað sem nefnist Shooters.

Úr þessu verður væntanlega bætt að einhverju leyti með nýrri stórbyggingu Alþingis sem á að rísa milli Vonarstrætis og Kirkjustrætis. Hún verður engin smásmíð – en það var einmitt á þessum reit að Sigmundur Davíð lagði til að yrði byggt eftir gamalli teikningu Guðjóns Samúelssonar.