Harpa Sævarsdóttir, stjórnarmaður í VR og fyrrverandi varaformaður félagsins, gagnrýnir sitjandi formann og einn frambjóðanda til formannsembættis, Höllu Gunnarsdóttur, harkalega í aðsendri grein á Vísir.is í dag.

Harpa segir sundrungu ríkja innan stjórnar félagsins, þveröfugt við það sem Halla heldur fram:

„Nú standa yfir kosningar til formanns og stjórnar hjá VR, þar eru nokkrir frambærilegir kostir og sitjandi formaður Halla Gunnarsdóttir. Því miður hefur allt starf innan VR farið á verri veg og mikil sundrung innan stjórnar sem er ekki heillavænlegt fyrir félagið.

Það er því sérkennilegt að sjá í fjölmiðlum þegar Halla heldur því fram að eftir að hún tók við formennsku hafi aldrei verið meiri friður og samvinna innan stjórnar VR, því er hins vegar þveröfugt farið og sjaldan verið eins mikil sundrung og ósætti þar innan dyra. Réttkjörnir stjórnarmenn eru sakaðir um vanhæfi til þess að gegna stjórnarstörfum og eru hundeltir af rannsóknarnefnd um hæfi.“

Harpa segir að flestir stjórnarmenn vinni af heilindum og erfitt sé fyrir fólk að vera borið ósönnum sökum. Ennfremur skrifar hún:

„Fundarstjórn er nánast engin þar sem fólk veður upp með frekju og æsing ef allir eru ekki sammála því sem er verið að leggja fram af formanni og jafnvel er slökkt á viðkomandi í miðjum umræðum (þeir sem eru á fjarfundi). Þetta eru vinnubrögð sem Halla Gunnarsdóttir kemur með að borðinu fyrir VR félaga.“

 Harpa sparar ekki stóryrðin gegn Höllu og segir að VR fari í endanlega í vaskinn ef hún verður kjörin formaður. Hún segir Höllu hafa notað úthringiver sitt til að rægja annan frambjóðanda, Bjarna Þór Sigurðsson:

„Það er ekki drengileg framkoma en kemur ekki á óvart því miður. Bjarni Þór á ekki skilið þá ófræingarherferð sem Halla stendur fyrir gagnvart honum. Ég hef unnið með Bjarna í mörg ár innan stjórnar og ber honum söguna vel og yrði hann mun betri kostur fyrir VR ef hann næði kjöri sem formaður VR.“