Það kom mörgum á óvart þegar í ljós kom að Jakob Frímann yrði ekki á lista Flokks fólksins fyrir komandi kosningar. Hann var oddviti flokksins í Norðausturkjördæmi sem var eitt helsta vígi flokksins. Hann tilkynnti svo fyrir skemmstu að hann hefði ákveðið segja sig úr Flokki fólksins og ganga til liðs við Miðflokkinn þar sem hann skipar 2. sætið í Reykjavík norður.
Í frétt Vísis er sagt frá ummælum sem Jakob lét falla á kosningafundi um skapandi greinar í Grósku í gær, en þar sagði hann að hafi eitthvað borið í milli í aðdraganda þess að hann sagði sig úr Flokki fólksins, hafi borið í milli hvað varðaði listamannalaun. Hann hafi viljað fjölga listamönnum á launum en ekki þingflokkurinn.
Sigurður Kári, sem sat á þingi fyrir Sjálfstæðisflokkinn á árunum 2003 til 2009, segir að Jakob Frímann eigi endilega von á góðu í Miðflokknum þegar kemur að þessu baráttumáli sínu.
„Ekki kemur á óvart að Jakob vilji hækka listamannalaun og fjölga þeim sem þau fá, enda hefur hann verið ötull málsvari listamanna um árabil. Jakob Frímann skipar 2. sætið á lista Miðflokksins í Reykjavík norður. Þar hittir hins vegar fyrir í 1. sæti, Sigríði nokkra Andersen, fyrrum þingmann og ráðherra Sjálfstæðisflokksins,” segir Sigurður Kári og heldur áfram:
„Við sem þekkjum Siggu, úr hennar fyrrum pólitíska lífi, vitum að hún hefur alla tíð barist með kjafti og klóm gegn listamannalaunum, sem hún vill ekki sjá. Þótt óhætt sé að segja að prinsippin hafi verið á nokkuð rækilegu undanhaldi hjá Sigríði síðustu vikurnar, eins og innganga hennar í Miðflokkinn og framboð fyrir þann flokk sýnir, ætla ég samt að leyfa mér að spá því að afstaða hennar til listamannalauna hafi ekki breyst, þrátt fyrir þessi einkennilegu vistaskipti,“ segir hann og bætir við:
„Því miður fyrir Jakob óttast ég að hann hafi í þessum efnum stokkið úr öskunni í eldinn. Það er a.m.k. ekki viðbúið að hugmyndum hans hækkun listamannalauna verði vel tekið af samflokkskonu hans, Sigríði, og heldur ekki öðrum Miðflokksmönnum sem talað hafa fyrir aðhaldi í ríkisrekstri,“ segir Sigurður Kári sem kveðst hlakka til að fyljast með þessum leiðtogum Miðflokksins takast á innbyrðis um listamannalaun og menningarmál í aðdraganda kosninga. „Það verður athyglisverð rimma.“
Jakob Frímann hefur ekki tjáð sig undir færslu Sigurðar Kára, en það hefur Sigríður Andersen þó gert. Hún spyr Sigurð Kára að hvaða leyti „prinsippin hennar“ hafi verið á undanhaldi og bætir svo við:
„Talandi um listamannalaun – í sumar var úthlutunarsjóðum fjölgað og launin hækkuð. Sett voru sérstök lög um að hækka launin á hverju ári næstu árin þrátt fyrir fyrirliggjandi hallarekstur. Þetta allt með atkvæðum þingmanna allra flokka nema Miðflokksins.“
