Rússar hyggjast setja upp ballettsýningu sem kallast Wuthering Heights upp í hinni hernumdu borg Sevastopol á Krímskaga. Notuð er tónlist Hildar Guðnadóttur og Philip Glass án leyfis.
Hinn 87 ára Bandaríkjamaður Glass vekur athygli á þessu á samfélagsmiðlinum X. Fer hann ekki mjúkum orðum um Rússana sem hann sakar um höfundaverkaþjófnað.
„Mér hefur verið bent á að ballett sem kallast Wuthering Heights, með tónlistinni minni og merktur mínu nafni í auglýsingum og kynningarefni, sé settur upp í Sevastopol óperu og balletthúsinu,“ segir Glass í færslu sem Wion og fleiri fjölmiðlar hafa fjallað um. „Notkun tónlistar og nafns míns án leyfis er þjófnaður,“ segir Glass ásakandi.
Samkvæmt auglýsingu á að frumsýna verkið næstkomandi mánudag, 29. júlí. Sagan er byggð á skáldsögu Emily Bronte, sem uppi var á nítjándu öld. Breskur danshöfundur að nafni Jonah Cook útsetti dansatriðin en tónlistin er að mestu komin úr smiðju Hildar Guðnadóttur og Philip Glass.
Rússar hernumdu Krímskaga, sem er úkraínskt svæði, árið 2014 og innlimuðu það. Alþjóðasamfélagið viðurkennir ekki innlimunina, frekar en innlimun Donetsk og annarra héraða sem Rússar hafa hernumið í Úkraínu.
Þvingunaraðgerðir vesturlanda ná meðal annars til menningarstarfsemi á hernumdum svæðum. Hafa listamenn sem komið hafa fram þar misst hlutverk og aðgang að vestrænum mörkuðum.
Wuthering Heights er leikstýrt af Sergei Polunin, sem er fæddur í Úkraínu en styður innrás Rússa inn í landið. Hann leikur einnig aðalhlutverkið í sýningunni. Cook leikur einnig í henni.
Philip Glass segist gera sér fullkomlega grein fyrir því að í ljósi stöðunnar í alþjóðamálum og að Krímskagi væri hernumið svæði gæti hann ekki sótt rétt sinn. Alþjóðalög væru gagnslaus eins og staðan er núna. Engu að síður mótmælir hann athæfinu.
„Ég mun koma því á framfæri að ég er algjörlega mótfallinn þessu ákveðir þú að halda áfram,“ segir Glass og beinir orðum sínum til Polunin.
Ekki hefur heyrst neitt frá Hildi Guðnadóttur vegna málsins.
Polunin, sem er 34 ára, hefur stýrt dansakademíu Sevastopol í fimm ár. Hann varð frægur innan balletheimssins mjög ungur og er þekktur sem „vondi strákur ballettsins.“
Eins og áður segir styður Polunin árás Rússa á Úkraínu. Hann er einarður stuðningsmaður Vladímírs Pútíns Rússlandsforseta og er með andlitið á honum húðflúrað á bringuna á sér. Polunin hefur einnig látið fé af hendi til að kaupa vopn fyrir rússneska herinn.
