Lögreglan á höfuðborgarsvæðinu handtók í gærkvöldi karlmann fyrir að hafa valdið hneykslun og verið með óspektir á almannafæri sökum ölvunar.

Að sögn lögreglu hafði maðurinn veist að vegfarendum og látið öllum illum látum. Þá streittist hann kröftuglega á móti þegar lögreglumenn hugðust handtaka hann en var yfirbugaður að lokum. Hann var vistaður í fangaklefa þar til af honum rennur.

Þá barst lögreglu tilkynning um mann sem var sagður hafa veifað skotvopni fram af svölum. Í ljósi alvarleika tilkynningarinnar var óskað aðstoðar frá sérsveit ríkislögreglustjóra. Eftir nokkra upplýsingaöflun og vettvangsvinnu kom í ljós að þarna var um leikfangabyssu að ræða.