Héraðssaksóknari hefur ákært mann fyrir stórfellda líkamsárás fyrir utan Síðumúla 37 í Reykjavík.

Atvikið átti sér stað aðfaranótt sunnudagsins 10. október árið 2021. Í ákæru segir að maðurinn hafi hrint öðrum manni með báðum höndum þannig að hann féll og skall með höfuðið í jörðina, með þeim afleiðingum að hann hlaut höfuðkúpubrot á ennisbeini, marblæðingar á framheila og gagnaugageira.

Héraðssaksóknari krefst þess að hinn ákærði verði dæmdur til refsingar og greiðslu alls sakarkosnaðar.

Fyrir hönd brotaþolans er krafist miskabóta, skaðabóta, þjáningabóta og málskostnaðar. Brotaþolinn krefst fjögurra milljóna í miskabætur og þjáningabóta upp á rúmlega 230 þúsund krónur. „Einnig er þess krafist að ákærða verði gert að greiða lögmannskostnað brotaþola við að koma bótakröfunni á framfæri og vegna hagsmunagæslu við meðferð málsins fyrir dómi skv. málskostnaðarreikningi sem lagður verður fram við meðferð málsins eða samkvæmt mati dómsins,“ segir ennfremur í ákærunni.

Málið verður þingfest við Héraðsdóm Reykjavíkur 24. apríl næstkomandi.