Vignir Már Þormóðsson, fyrrum stjórnarmaður hjá KSÍ og fyrrum formaður knattspyrnudeildar KA skoðar nú framboð til formanns KSÍ. Þetta staðfestir hann í samtali við 433.is í dag.

Hann er í dag varaformaður aðalstjórnar hjá KA. Vignir hefur mikla reynslu úr hreyfingunni en hann var í stjórn KSÍ frá árinu 2007 til ársins 2019 þegar hann ákvað að stíga til hliðar.

„Það hefur verið potað í mig, ég er bara búinn að vera að skoða þetta. Ég tek ákvörðun fyrr en seinna,“ segir Vignir í spjalli við 433.is.

Vignir var sæmdur gullmerki ÍSÍ árið 2019 þegar hann hætti í stjórn KSÍ en hann var meðal annars formaður mótanefndar til margra ára.

Samkvæmt heimildum 433.is er hið minnsta einn fyrrum stjórnarmaður sem myndi bjóða sig fram til stjórnar ef Vignir færi fram, sá aðili hætti í stjórn sambandsins í ársbyrjun árið 2022.

Vignir var vel liðinn í starfi sínu sem stjórnarmaður KSÍ enda var hann ítrekað endurkjörin, hann skoðar nú hvort hann eigi möguleika á því að ná kjöri sem formaður.

Vanda Sigurgeirsdóttir, núverandi formaður KSÍ, ætlar að hætta í febrúar þegar ársþing sambandsins fer fram. Guðni Bergsson, fyrrum formaður sambandsins hefur staðfest framboð en það gerði hann í lok nóvember.

Vignir er nú að skoða sín mál en Þorvaldur Örlygsson, fyrrum landsliðsmaður í knattspyrnu hefur hringt mikið af símtölum og skoðað hvort hann eigi að taka slaginn.