Mauricio Pochettino, stjóri Chelsea, viðurkennir að fyrirliði liðsins, Reece James, sé frekar niðurlútur þessa dagana eftir að hafa meiðst enn á ný í tapinu gegn Everton síðustu helgi.

James hefur meira og minna verið á meiðslalistanum undanfarin ár en þetta er í annað sinn á þessari leiktíð sem hann meiðist aftan í læri. Hefur James aðeins spilað átta leiki í ensku úrvalsdeildinni á leiktíðinni.

„Hann er svolítið niðurlútur því hann var spenntur að snúa aftur. Það er erfitt að taka þessu. Hann er vonsvikinn og pirraður,“ segir Pochettino.

„Þegar leikmenn spila ekki eru þeir leiðir. Þegar það gerist oft er erfitt að vera sáttur.“