Brotið hér að neðan er hluti úr þættinum, sem má horfa á í heild sinni hér.
Árið 2015 tók Stefanía stökkið, hún hætti í vinnunni sinni og einbeitti sér alfarið að tónlistinni. Það gekk vel þar til heimsfaraldur skall á og engin verkefni var að fá. Hún segir að þetta hafi verið mjög krefjandi tími.
„Hann var rosalega erfiður, alveg mjög. Svo líka, þegar Covid-skall á var ég nýbúin að komast að því að ég væri ólétt og þremur mánuðum síðar hætti ég með barnsföður mínum. Þetta var mjög erfiður og mjög skrýtinn tími. En líka rosalega þroskandi einhvern veginn. Ég kom fílefld til baka eftir það. Svo þurfti ég líka að skoða sjálfa mig, því svo mikið af sjálfsmyndinni minni var bundið við að vera söngkona, þannig ef ég er ekki að syngja, hver er ég þá? Ég þurfti að finna mig sjálfa upp á nýtt í þessu ferli.“
Stefanía segir að það hafi verið sjokk að komast að því að hún væri ólétt. Þetta var annað barn þeirra, sonur þeirra var þá eins og hálfs árs gamall. „Ég var bara „ó shit,“ segir Stefanía og hlær.
„Ég var bara í smá geðshræringu. Mamma hafði oft sagt við mig að það væri gott að hafa stutt á milli barna. Ég sagði henni að gleyma pælingunni því mér fannst mjög erfitt að verða mamma. Þetta er rosalega krefjandi hlutverk, besta hlutverk í heimi en mjög erfitt. Þannig það var smá geðshræring í nokkra daga. En svo var góð kona sem sagði við mig að börn séu alltaf blessun, og hún er það svo sannarlega,“ segir hún.
„Sambandsslit eru nógu erfið, þó maður sé ekki fullur af hormónum. Ég á ofboðslega gott fólk að, frábæra vini og fjölskyldu og ég lagði mjög mikið upp úr því að stunda mikla sjálfsrækt og passa að hlúa að mér og rækta mig. Þannig komst ég í gegnum þetta.“
Fylgstu með Stefaníu á Instagram og smelltu hér til að hlusta á tónlistina hennar á Spotify.
