Tryggingafélagið Vörður hefur ákveðið að fella niður iðgjöld í desember hjá öllum einstaklingum, fjölskyldum og fyrirtækjum sem hafa aðsetur í Grindavík og eru í viðskiptum við Vörð.

Forstjóri Varðar, Guðbjörg Heiða Guðmundsdóttir, segir í tilkynningu:

„Hugur okkar er hjá Grindvíkingum og við höfum ákveðið að fella niður iðgjöld í desember hjá öllum fyrirtækjum og fjölskyldum sem hafa flúið heimili sín í Grindavík. Það er ekki oft sem við stöndum frammi fyrir jafn mikilli óvissu í landinu okkar og mikilvægt að allir leggi sitt á vogarskálarnar.“

Viðskiptavinir Varðar í Grindavík geta fengið nánari upplýsingar á vef Varðar eða hjá þjónustuveri.