Dóttir kraftamannsins og leikarans Hafþórs Júlíusar Björnssonar og eiginkonu hans, hinnar kanadísku Kelsey Henson fæddist andvana í vikunni. Greindu þau frá þessu á Instagram.
„Það er með mikilli sorg sem við tilkynnum að dóttir okkar, Grace Morgan Hafþórsdóttir, fæddist andvana þann 8. nóvember eftir 21 og hálfrar viku meðgöngu. Eftir að tekið var eftir því að hreyfingar höfðu minnkað komumst við að því að hjartað var hætt að slá,“ segir í færslunni.
Segja þau að orð fái því ekki lýst hversu djúpt sársaukinn ristir eða þá hamingju að fá að eiga stund með henni.
„Hún er algjörlega falleg, með ljósa lokka og brúnir og lítið bros fyrir mömmu og pabba. Ástin sem við berum til hennar er yfirþyrmandi,“ segir í færslunni.
Hafþór og Kelsey giftust árið 2018 og eiga fyrir einn son. Þau greindu nýlega frá því að Kelsey gengi með annað barn þeirra.
Samkvæmt breska blaðinu The Mirror hafa margir aðdáendur vottað Hafþóri og fjölskyldu hans samúð sína.
