Tveir rússneskir herforingjar létust og 15 aðrir voru lagðir alvarlegar veikir inn á sjúkrahús í Maríupól í Úkraínu eftir hátíðarhöldin á Degi flotans en Rússar halda þann dag hátíðlegan ár hvert. Allir urðu mennirnir fyrir alvarlegri eitrun og er talið að úkraínskur andspyrnuhópur hafi staðið á bak við hana.

Kyiv Post skýrir frá þessu og segir að samkvæmt færslu Petro Andrusjtjenko, ráðgjafa Vadym Bojtjenko hins úkraínska borgarstjóra Maríupól, sem er í útlegð, á Telegram þá hafi árásin beinst að yfirmönnum rússneska hersing þegar Degi flotans var fagnað þann 30. júlí.

„Á meðan á hátíðarhöldunum stóð var eitrað fyrir fjölda herforingja. 17 rússneskir herforingjar voru lagðir inn á sjúkrahús. Tveir þeirra, sem urðu þar með „góðir Rússar“ létust í gær,“ skrifaði Andrusjtjenko á föstudaginn.

Hann sagði að rússneska hernámsliðið telji að úkraínskir andspyrnumenn hafi eitrað fyrir Rússunum með blásýru og skordýraeitri.

„Okkar fólk segir brosandi: „Það þarf alltaf að gefa rottum eitur.“ Dagurinn byrjaði með góðum fréttum. Skemmdarverk er svo fallegt orð, eruð þið ekki sammála,“ skrifaði hann einnig.

Hann sagði að Y-hópurinn hafi gert árásina en hann er hluti af andspyrnuhreyfingunni í Maríupól.