Lögreglan á Suðurlandi er komin með bráðabirgðaniðurstöður úr krufningu konunnar sem fannst látin í heimahúsi á Selfossi í lok apríl. Telur lögreglan sig komna með nokkuð skýra mynd af atburðarrásinni sem leiddi til andlátsins og mun hún funda með aðstandendum hinnar látnu í dag.
Tveir menn, stjúpbræður á þrítugsaldri, voru handteknir á vettvangi og úrskurðaðir í gæsluvarðhald til 5. maí. Öðrum þeirra var sleppt úr gæsluvarðhaldi í gær, en farið hefur verið fram á gæsluvarðhald yfir hinum verði framlengt vegna rannsóknarhagsmuna. Verður hann leiddur fyrir dómara síðdegis í dag sem mun taka ákvörðun um hvort beiðni um framlengt gæsluvarðhald verði staðfest eða manninum sleppt úr haldi.
Von er á tilkynningu frá lögreglu vegna málsins síðar í dag.
