Hæstiréttur hefur komist að þeirri niðurstöðu að Árnmar Jóhannes Guðmundsson fái ekki áfrýjunarleyfi vegna átta ára fangelsisdóms sem hann hlaut fyrir skotárás á Egilstöðum í ágúst 2021. Héraðsdómur Austurlands sakfelldi Árnmar fyrir tvær tilraunir til manndráps, vopnalagabrot, brot í nánu sambandi, húsbrot, eignaspjöll og brot get valdstjórninni og Landsréttur staðfesti þann úrskurð í desember 2022 og hækkaði miskabætur til þolenda.
Í áfrýjunarbeiðninni kemur fram að Árnmar óski aðeins eftir endurskoðun á manndrápstilraununum tveimur, sem hann lýsti sig líka saklausan af á fyrri dómstigum, en að virtum gögnum málsins féllst Hæstiréttur ekki á þau uppfylltu skilyrði til áfrýjunar.
