Maður var í dag sakfelldur í Héraðsdómi Reykjavíkur vegna atviks sem átti sér stað inni á skemmtistað á Hverfisgötu í janúar árið 2020.

Maðurinn hélt þá hnífi að kviði annars gests á staðnum, svo fast að peysa mannsins rifnaði undan hnífnum. Í nafnhreinsaðri ákæru er þetta orðað svo:

„fyrir hótun gegn A, kt. […], með því að hafa, aðfaranótt sunnudagsins 12. janúar 2020, á […] að Hverfisgötu […] í Reykjavík, haldið hnífi upp að kviði A en hótunin var til þess fallin að vekja hjá honum ótta um líf sitt, heilbrigði og velferð.“

Aðdragandi árásarinnar var sá að tveir menn ávörpuðu hinn ákærða og kröfðu hann um greiðslu skuldar. Brást hann þá við með þessum hætti, og raunar samkvæmt mönnunm þá dró hann upp hnífinn er hann sá þá nálgast, áður en þeir höfðu haft orð á skuldinni.

Maðurinn, sem neitaði sök, sagði hins vegar að mennirnir hefðu ógnað honum og hótað vegna meintrar peningaskuldar. Hefði hann flútið staðinn en tekið upp vasahníf fyrir utan staðinn án þess þó að opna hann.

Í lögregluyfirheyrslu eftir atvikið kannaðist maðurinn hins vegar ekki við að hafa verið með hníf á sér og gerði því skóna að hnífnum, sem fannst við leit á honum, hefði verið komið fyrir í fatnaði hans.

Dyraverðir yfirbuguðu manninn inni á staðnum og hentu honum út í kjölfar atviksins. Fyrir dómi bar starfsfólk vitni um að maðurinn hefði dregið upp hníf inni á staðnum.

Var hann því sakfelldur en hlaut vægan dóm, 30 daga skilorðsbundið fangelsi. Hann þarf hins vegar að greiða verjanda sínum eina milljón króna í málsvarnarlaun.