Samtök fjármálafyrirtækja vara sérstaklega við svikahrinu á netinu þessa dagana. Segja samtökin að óvenjumikið hafi verið um svikatilraunir síðasta sólarhringinn og hvetja þau fólk til að vera á varðbergi.

Svikin lýsa sér í trúverðugum sms-skilaboðum í tengslum við væntanlegar sendingar. Lykilatriði er að veita ekki svikahröppum aðgengi með rafrænum skilríkjum. Ef slíkt gerist er nauðsynlegt að hringja í neyðarþjónustu viðkomandi viðskiptabanka og láta loka appi og kortum. Fréttatilkynning frá Samtökum fjármálafyrirtækja um þetta er eftirfarandi:

Fréttatilkynning frá Samtökum fjármálafyrirtækja:

Appelsínugul viðvörun vegna svika

Ástæða er til að vara sérstaklega við svikahrinu þessa dagana.

Á síðasta sólarhring hefur verið óvenju mikið um svikatilraunir og er ástæða til að biðja fólk að vera sérstaklega á varðbergi.

Svikin ganga þannig fyrir sig að einstaklingar fá sms í tengslum við væntanlegar sendingar. Þessar sms sendingar geta verið mjög trúverðugar. Fólk er beðið um slá inn símanúmer, sem svikararnir síðan nýta til að komast inn í netbanka / öpp viðkomandi.

Þeir sem hafa treyst á slík sms hafa veitt þessum svikurum aðgengi að bankaupplýsingum sínum með rafrænum skilríkjum. Afar mikilvægt er að hringja þegar í neyðarþjónustu hjá sínum banka og láta loka bæði appi og kortum. Öryggisþjónustur bankanna hafa á síðasta sólarhring náð að loka svikasíðu, en í kjölfarið verða nýjar stofnaðar og svikatilraunir halda áfram. Oft hefur fólk verið beðið um kortaupplýsingar en núna er beðið um símanúmer.

Þá er vert að brýna fyrir viðskiptavinum bankanna að vera alltaf á varðbergi þegar það notar rafræn skilríki.