Orð Jose Mourinho frá árinu 2020 um fjármögnun Manchester City og þá rannsókn UEFA á félaginu fara nú líkt og eldur í sinu um veraldarvefinn.
Mourinho var þá stjóri Tottenham og ræddi þar um áfrýjun City sem bar árangur og slapp félagið við bann frá keppnum UEFA.
Félagið var hins vegar dæmt til að greiða sekt en félagið er nú aftur undir rannsókn fyrir brot á fjármagnsreglum, nú frá ensku úrvalsdeildinni. „Þetta eru endalokin hjá Financial Fair Play, það er enginn tilgangur,“ sagði Mourinho árið 2020.
„Ef City er saklaust, þá er þetta skammarleg niðurstaða. Ef City braut reglur, er þetta líka skammarlegt. Þetta er skammarleg niðurstaða, því ef City braut ekki reglur þá er félaginu ekki refsað með 10 milljóna punda sekt.“
„Ef þú ert saklaust áttu ekki að fá sekt, ef þeir eru sekir þá á að dæma þá úr leik.“
Orð Mourinho eru hér að neðan.
Jose Mourinho back in 2020 on Manchester City & FFP 👀#ManCity #FFP #PremierLeague pic.twitter.com/OeckX6S8lY
— FootTheBall FC (@FootTheBallFC) February 7, 2023
City gæti verið í slæmum málum eftir að enska úrvalsdeildin ákærði félagið í yfir hundrað liðum og sakar félagið um að brjóta reglur um fjármál félaga.
Rannsókn hefur staðið yfir í fjögur ár en ákærurnar voru birtar í gær. Í yfirlýsingu segir að meint brot hafi átt sér stað frá 2009 til ársins 2018.
„Félagið er grunað um að hafa ekki skilað af sér réttum upplýsingum þegar kemur að tekjum, tengdum aðilum og kostnaði,“ segir í yfirlýsingu deildarinnar.
Á þessum tíma varð City meðal annars enskur meistari í þrígang. Möguleiki er á því að félaginu verði refsað með því að stig verði tekin af því eða þaðan af verra, eins og að það verði fellt niður um deild.
