Þetta sagði hann í samtali við Sænska ríkisútvarpið. Með þessum ummælum vísaði hann til þess að Tyrkir standa í vegi fyrir að Finnland og Svíþjóð fái inngöngu í varnarbandalagið.
Hann sakaði Recep Tayyip Erdogan, forseta Tyrklands, um að beita kúgun hvað varðar aðild ríkjanna að NATO.
Vaxandi gagnrýni er uppi í Bandaríkjunum á framgöngu Erdogan hvað varðar inngöngu Finnlands og Svíþjóðar í NATO og eru þingmenn úr röðum Demókrata og Repúblikana meðal þeirra sem gagnrýna Erdogan.
Bolton, sem er Repúblikani, var eins og áður sagði þjóðaröryggisráðgjafi á valdatíma Donald Trump og sendiherra Bandaríkjanna hjá SÞ á valdatíma George W. Bush.
Í viðtalinu við Sænska ríkisútvarpið benti hann á að kaup Tyrkja á rússneska S-400 loftvarnarkerfinu árið 2017 sé meðal annars ein af ástæðunum fyrir að reka eigi Tyrki úr NATO. „Kaupin á S-400 loftvarnarkerfinu eru í raun útganga úr NATO. Það er hægt að samstilla það við öll rússnesk loftvarnarkerfi en alls ekki við kerfi NATO,“ sagði hann.
Önnur góð ástæða til að reka Tyrki úr bandalaginu að mati Bolton er framganga Erdogan gagnvart Finnlandi og Svíþjóð. „Þetta er undarlegt. Ég vona bara að fólk í þessum löndum missi ekki þolinmæðina,“ sagði hann og bætti við: „Þetta er einhverskonar kúgun. Erdogan hegðar sér eins við sína eigin þjóð svo það kemur ekki á óvart að hann komi svona fram við aðra.“
Aðspurður um hvort það sé hægt að reka aðildarríki úr NATO sagði hann að samkvæmt „rebus sic stantibus“ klásunni í þjóðarrétti sé hægt að gera nánast hvað sem er. Tyrkir geti valið hvort þeir vilja vera í NATO en það sé líka hægt að leggja NATO niður og stofna nýtt varnarbandalag. „Það eru margar leiðir til að leysa þetta,“ sagði hann.
