Berglind Hreiðars okkar ástsæli matarbloggari hjá Gotterí og gersemar töfraði fram þessar dásamlegu súrdeigsbrauðsneiðar sem hún kallar sveppasneiðar með alls konar kræsingum sem hitta í mark.

„Þessar sveppasneiðar urðu til þegar ég var að skoða alls konar hugmyndir með súrdeigi á netinu. Þar sá ég gómsæta sneið með sveppum og öðru á einum stað, fetaosti á öðrum og úr varð þessi samsetning með kotasælu sem var algjört dúndur. Það tekur enga stund að útbúa þær og þetta getur verið hádegismatur, snittur eða kvöldmatur sem þið munið elska,“ segir Berglind. Nú er bara að prófa og sjá hvort þessar hitti ekki í mark.

Súrdeigsbrauð með sveppum og kotasælu

6 litlar brauðsneiðar (fyrir 2-3)

6 sneiðar af súrdeigsbrauði (snittubrauði)

200 g kotasæla (ein lítil dós)

100 g kastaníusveppir

150 g kjúklingabaunir

Ólífuolía til steikingar

Salt, pipar, hvítlauksduft, chilliduft

Kóríander

Skáskerið 6 sneiðar úr brauðinu og steikið upp úr ólífuolíu, leggið til hliðar. Skerið næst sveppina í sneiðar og steikið upp úr ólífuolíu, kryddið eftir smekk. Á meðan sveppirnir steikjast má setja kotasælu á hverja brauðsneið og síðan skipta sveppunum niður ofan á kotasæluna. Steikið að lokum kjúklingabaunirnar og kryddið eftir smekk, mér fannst gott að setja vel af chillidufti. Ef það kemur mikill safi á pönnuna af baununum er gott að hella honum af áður en þið kryddið endanlega til að þær nái aðeins að steikjast og fá stökka húð.

Toppið með söxuðum kóríander.