Rétt fyrir kl.1 í nótt var tilkynnt um tvo sextán ára gamla drengi sem voru að skemma bifreiðar í Seljahverfi. Þetta kemur fram í dagbók lögreglu en þegar laganna verði bar að garði voru drengirnir búnir að skemma tólf bifreiðar. Þeir voru handteknir og færðir á lögreglustöð þar sem tekin var skýrsla af þeim að viðstöddum forráðamönnum og Barnavvernd.

Skömmu áður hafði lögregla fengið tilkynningu um tvo menn að bera hluti út úr byggingu þar sem framkvæmdir standa yfir í hverfi 108. Mennirnir voru handteknir þegar þeir voru að keyra af vettvangi en grunur leikur á að ökumaðurinn hafi verið undir áhrifum fíkniefna en að auki var bifreiðin stolin. Mennnirnir voru vistaðir í fangageymslu lögreglu í nótt vegna rannsóknar málsins.

Þá varð bílslys á Heiðmerkurvegi rétt fyrir kl.21 í gærkvöldi. Sautján ára gamall ökumaður missti stjórn á bifreið sinni sem endaði utan vegar og valt. Ökumaður og farþegar fóru með foreldrum sínum á Bráðadeild en í dagbók lögreglu kemur fram að ekki sé vitað um áverka fólksins á þessari stundu.