„Nú verður ríkið að stíga inn í og lengja fæðingarorlof barna,“ segir Hólmfríður Árnadóttir, leik- og grunnskólakennari í aðsendri grein á Visir.is sem ber yfirskriftina: „Tryggjum börnum gott atlæti – núna.“
„Þó löngu fyrr hefði verið enda ótal rannsóknir sem sýna fram á að börnum er best borgið með sínu besta fólki, foreldrum sínum fyrstu tvö árin, þessum mikilvægu árum geðtengslamyndunar. Alþingi ákvarðar lengd fæðingarorlofs og nú er lag að koma til móts við börnin fyrst og fremst en einnig foreldra/fjölskyldur og sveitarfélög því sannarlega má segja að nú ríki neyðarástand og ljúft væri að stjórnmálamönnum rynni blóð til skyldunnar,“ segir Hólmfríður.
Hún leggur áherslur á að vel sé staðið að málefnum barna og bendir á að fæðingartíðni hafi aðeins verið 1,82 á síðasta ári sem þó hafi verið eitt metára í fæðingum.
„Gefum okkur að börn vilji dvelja sem mest með foreldrum sínum fyrstu tvö árin, fara svo í góðan leikskóla með faglærðu starfsfólki, fyrsta skólastiginu, þar sem hlúð er að félags-, tilfinninga-, hreyfi- og málþroska ásamt ýmsu öðru sem frjálsum leik, aðal kennsluaðferð leikskólans, tilheyrir. Gefum okkur líka að með því að tryggja að svo sé drögum við úr álagi á foreldra og fjölskyldur barnanna sem og á velferðarkerfin okkar, heilbrigðis-, félags- og menntakerfin, sem fleiri rannsóknir sýna að gerist þegar vel er hlúð að í frumbernsku, er þá ekki til mikils að vinna?“ spyr Hólmfríður.
