Fyrrverandi sambýlismaður Lindu Gunnarsdóttur var fyrr í þessum mánuði sakfelldur fyrir að beita hana ofbeldi. Kæru Lindu var upphaflega vísað frá á þeim grunni að um væri að ræða orð gegn orði, þrátt fyrir að áverkavottorð sýndi átta áverka og árásin væri flokkuð sem alvarleg.

Fjórum dögum eftir að Linda sagði sögu sína í Fréttablaðinu síðasta vor var rannsókn málsins tekin upp að nýju. Linda er sannfærð um að viðtalið sem hún fór í hafi verið ástæða þess að málið var aftur tekið upp. Hún gagnrýnir vinnubrögð lögreglu og ákærusvið harðlega og segir alla vinnslu málsins litaða af vanhæfni og mistökum.

Linda er aftur í viðtali við Fréttablaðið í dag þar sem hún segist fagna sakfellingunni en finnst sorglegt að brotaþolar þurfi sjálfir að taka málin í eigin hendur, eins og hún gerði með því að stíga fram í viðtalinu og ekki allir sem treysti sér í slíkt. „Mig langaði ekkert að fara í viðtal. Þetta eru persónulegir hlutir sem mig langar ekkert að allir viti um mig.“

Maðurinn var áberandi í sjónvarpsþáttum

Fyrrverandi sambýlismaður Lindu hafði fengið töluvert pláss í fjölmiðlum en hann var í sjónvarpsþáttum og var mikið til umfjöllunar vegna þeirra og lýsti Linda því í viðtalinu hvaða áhrif það hafði á hana.

Hún segir málsmeðferðina alla hafa verið undarleg. Þegar maðurinn var síðan ákærður fékk hún eða lögmaður hennar engar upplýsingar um það fyrr en nokkrum dögum áður en málið átti að fara fyrir dóm.

Hann var sakfelldur 17. ágúst en viku seinna höfðu hvorki Linda né lögmaður hennar fengið að sjá dóminn, en Linda heyrði fyrst af niðurstöðinni frá blaðamanni Fréttablaðsins.

Fékk vægan skilorðsbundinn dóm

Í dómnum kemur fram að maðurinn hafi til að mynda tekið af sér belti og lamið Lindu með sylgjunni. Þá var maðurinn mjög stjórnsamur og vildi ráða hvernig hún klæddi sig og greiddi sér.

Maðurinn fékk þriggja mánaða skilorðsbundinn dóm.

Hér má lesa dóminn í heild sinni.

„Það er bara gott að vera glæpamaður á Íslandi,“ segir Linda sem hefði viljað sjá þyngri dóm en einnig samfélagsþjónustu eða meðferð.

Hér má lesa viðtalið í Fréttablaðinu í heild sinni.