Neytendastofa birti í dag úrskurð þar sem N1 rafmagni er bannað að viðhafa tiltekna viðskiptahætti. Annars vegar er fyrirtækið áminnt fyrir að hafa ekki birt verðupplýsingar fyrir svokallaða þrautavaraleið, sem ætluð er neytendum sem velja sér ekki raforkusala. Hins vegar var fundið að því að N1 rafmagn auglýsi að fyrirtækið bjóði upp á ódýrasta rafmagnið þegar staðreyndin er sú að annar aðili á markaðnum býður upp á sama verð.
Neytendastofa birtir ítarlegan úrskurð um málið. Í svörum sínum við athugasemdum Neytendastofu sagði N1 rafmagn að félaginu væri ekki skylt að greina frá viðskiptum keppinautar og bæri því ekki skylda til að greina frá því að annar aðili byði upp á sama verð. Verðið hjá N1 rafmagni væri sannanlega það lægsta á markaðnum. Neytendastofa hafnaði þessum röksemdum.
Þrautavaraleið er ætluð þeim viðskiptavinum sem hafa ekki valið sér raforkusala. N1 rafmagn taldi sig ekki þurfa að birta verðupplýsingar fyrir þrautavaraleið en birti verð fyrir þá viðskiptavini sem eru á föstum samningi enda sé rafmagn sem þeim er veitt keypt í gegnum langtímasamninga. Neytendastofa ítrekaði að fyrirtækinu bæri að birta verðupplýsingar til viðskiptavina í þrautavaraleið líka í markaðsefni sínu.
Niðurstaða Neytendastofu er að N1 rafmagn ehf. hafi brotið gegn ákvæðum samkeppnislaga með því að birta ekki verð fyrir þrautavaraleið og sömuleiðis með því að birta fullyrðinguna „ódýrasta rafmagnið“ í markaðsefni sínu.
