Tilkynnt var um rán í gærkvöldi í matvöruverslun í hverfi 108. Maður réðst á kassastarfsmann með ofbeldi og stal peningum úr sjóðsvél. Hann flúði svo í bifreið. Lögreglumenn sáu bílinn skömmu síðar og hófst eftirför. Árásaraðilinn ók utan í margar bifreiðar og ók á móti umferð til að reyna að komast undan lögreglunni en keyrði á og var tekinn fastur. Maðurinn er einnig grunaður um akstur undir áhrifum fíkniefna, ítrekaðan akstur sviptur ökuréttindum, vörslu fíkniefna og fleira.
Þetta kom fram í dagbók lögreglunnar. Þar kom einnig fram að ungur drengur í annarlegu ástandi hafi ráðist á tvær stúlkur og reynt að ræna þær um miðnætti í gær. Hann kýldi aðra stelpuna í andlitið en þær náðu að hlaupa til foreldra. Drengurinn var handtekinn og var vistaður á viðeigandi stofnun í samráði við foreldri og Barnavernd.
Einnig hafði lögreglan afskipti af ölvuðum manni með stóra kylfu í miðbænum. Hann var handtekinn og kylfan tekin af honum. Hann sagðist hafa orðið fyrir líkamsárás og ætlaði að leita hefnda með kylfunni. Manninum var sleppt lausum eftir viðræður og fór heim til sín.
