Sum fórnarlömbin höfðu verið bundin á höndum áður en þau voru skotin, sum í hnakkann. Aðallega var um karlmenn að ræða en einnig hafa lík nokkurra kvenna fundist sem og unglinga. Rússar höfðu haft bæinn á sínu valdi í fimm vikur. Í morgun var skýrt frá því að 410 lík hafi fundist í bænum.
Fordæmingu hefur rignt yfir Rússa í kjölfar frétta af níðingsverkunum en þeir neita sök og segja að allt sé þetta sviðsett af Úkraínumönnum. Því trúar fáir á Vesturlöndum og raunar eiga fréttir af þessum níðingsverkum ekki að koma svo mikið á óvart því herir Pútíns hafa áður beitt svipuðum aðferðum, til dæmis í Téténíu.
Þjóðarleiðtogar hafa fordæmt framferði Rússa. Vestrænir leiðtogar segja að herða verði refsiaðgerðirnar gegn Rússum enn frekar. Aðalritari SÞ sagði að honum væri „mjög brugðið“ vegna mynda af fjölda líka á götum bæjarins.
Í gær birtu mannréttindasamtökin Human Rights Watch skýrslu þar sem því er slegið föstu að rússneskir hermenn hafi margoft gerst sekir um stríðsglæpi í Úkraínu og hafi þeir beinst gegn óbreyttum borgurum á þeim svæðum sem Rússar hafa hertekið. Um er að ræða nauðganir, aftökur og hótanir í garð óbreyttra borgara. Þetta hefur átt sér stað í Tjernihiv og Kharkiv og höfuðborginni Kyiv að því er segir í skýrslunni.
Cecilie Felicia Stokholm Banke, sérfræðingur í utanríkismálum hjá Dansk Institut for Internationale Studier, sagði í samtali við Jótlandspóstinn að enn sé margt óljóst um hvað gerðist í Bútsja og öðrum herteknum svæðum en fréttir gærdagsins bendi til að stríðsglæpir hafi verið framdir. „Myndirnar sem við sjáum sýna að hér er um stríðsrekstur að ræða sem beinist ekki eingöngu gegn hernaðarlegum skotmörkum,“ sagði hún.
En stóra spurningin er hvernig Vesturlönd munu bregðast við vegna ásakana um að Rússar stundi beinlínis þjóðarmorð í Úkraínu og brjóti gegn reglum um stríðsrekstur. Banke sagði að það sé alveg ljóst að nú þegar Úkraína líki þessu við svipuð ódæðisverk í stríðinu á Balkanskaga á tíunda áratugnum og segi að svipaðir atburðir séu í uppsiglingu ef Vesturlönd grípi ekki inn í þá muni það hafa áhrif á sjálfsvitund Vesturlanda og siðferðislegar skyldur til að grípa inn í. „Það er það sem setur Vesturlönd í mjög erfiða stöðu núna,“ sagði hún.
Nú er stóra spurningin hvort og þá hvernig Vesturlönd geta gripið inn í vegna þeirra stríðsglæpa sem hersveitir Pútíns hafa framið í Úkraínu án þess að stigmagna stríðsátökin. Það verður eflaust umræðuefni á fundi utanríkisráðherra NATÓ-ríkjanna í Brussel á morgun en Anthony Blinken, utanríkisráðherra Bandaríkjanna, tilkynnti í gærkvöldi að hann haldi til Brussel til fundar við utanríkisráðherrana. Þar verður rætt um hvernig er hægt að láta Pútín sæta ábyrgð fyrir glæpi sína og flýta fyrir lokum stríðsins.
